Protesta qytetare kundër projektit turistik në Zvërnec vijoi sot për të 22-ën ditë radhazi, duke shënuar një tjetër tubim masiv në qendër të Tiranës. Ndonëse lëvizja nisi si reagim ndaj zhvillimit të projektit në zonën e mbrojtur të Zvërnecit, me kalimin e ditëve ajo ka marrë një dimension më të gjerë politik, me pjesëmarrësit që kërkojnë ndryshime të thella në qeverisjen e vendit dhe në klasën politike që, sipas tyre, ka dominuar Shqipërinë gjatë 35 viteve të fundit.
Në nisje të protestës, aktivistët organizatorë u ndalën te incidenti i ndodhur një natë më parë, kur u hoq flamuri izraelit. Përfaqësues të protestës u distancuan publikisht nga veprimi, duke e cilësuar atë si një akt të kryer nga individë të infiltruar.
“Mes nesh dje apo edhe në ditë të tjera ka pasur grupe të infiltruara. Në ditët në vijim do të dalim edhe me emra e fytyra për t’i demaskuar. Ne distancohemi plotësisht nga ky veprim”, deklaroi një prej aktivistëve.
Edhe sot protestës iu bashkuan qytetarë të ardhur nga diaspora, të cilët shprehën mbështetjen e tyre për kauzën dhe kërkesat e protestuesve.
Pas grumbullimit në sheshin “Skënderbej”, pjesëmarrësit marshuan drejt godinës së Kryeministrisë. Në fillim të tubimit përpara institucionit u këndua himni kombëtar, ndërsa më pas qytetarë dhe aktivistë mbajtën fjalime ku përsëritën kundërshtimin ndaj projektit turistik në Zvërnec dhe kritikuan politikat qeveritare.
Me pankarta dhe flamuj në duar, protestuesit ritheksuan pesë kërkesat e tyre kryesore: dorëheqjen e kryeministrit, shfuqizimin e statusit dhe kuadrit ligjor për investitorët strategjikë, anulimin e Paketës së Maleve, anulimin e ndryshimeve në Ligjin për Zonat e Mbrojtura dhe shfuqizimin e ndryshimeve në Ligjin për Trashëgiminë Kulturore.
“Jemi mbledhur këtu që rinia të mos detyrohet të largohet për të kërkuar shpresën jashtë vendit. Shqipërinë nuk e shet dot askush. Kjo protestë nuk duhet të dorëzohet, sepse ne jemi fuqia e këtij vendi”, u shpreh një protestuese.
Një pjesëmarrës i ardhur nga diaspora bëri thirrje për unitet, duke theksuar se qëllimi i protestës është bashkimi i qytetarëve dhe jo përçarja e tyre.
Gjatë fjalimeve u rikthye në vëmendje edhe ngjarja e 21 janarit 2011. Një protestues kujtoi katër viktimat e asaj dite dhe kërkoi drejtësi për ta, duke i bërë thirrje institucioneve të drejtësisë që të vijojnë hetimet.
Ndërkohë, një tjetër pjesëmarrës propozoi vendosjen e kufizimit të mandateve për kryeministrat, duke argumentuar se kjo do të ndihmonte në forcimin e demokracisë dhe shmangien e përqendrimit afatgjatë të pushtetit.
Pas përfundimit të fjalimeve përpara Kryeministrisë, protestuesit vijuan marshimin përgjatë bulevardit kryesor të Tiranës dhe në disa prej rrugëve kryesore të kryeqytetit, duke mbyllur kështu ditën e 22-të të një proteste që po shndërrohet gjithnjë e më shumë në një lëvizje me kërkesa të gjera politike dhe sociale.
© 2026 Argumentum
