Në ditën e katërt të protestës kundër projektit të Zvernecit, qendra e Tiranës u mbush me energjinë, revoltën dhe shpresën e qindra të rinjve që kishin ardhur nga qytete të ndryshme të vendit për të ngritur zërin në mbrojtje të asaj që e konsiderojnë pasuri kombëtare. Argumentum.al ndoqi nga afër zhvillimet e kësaj proteste, duke sjellë emocionet, tensionin dhe mesazhet që përshkuan tubimin.
Me pankarta në duar, me imazhe të pelikanëve, flamuj kuqezi dhe slogane të shumta, qindra të rinj u mblodhën në Sheshin Skënderbej, prej nga nisën marshimin drejt Bulevardit “Dëshmorët e Kombit” për t’u tubuar para Kryeministrisë.
Gjatë marshimit pati një ndalesë dhe një përballje të papritur me forcat e policisë. Një gardh metalik, i vendosur për të bllokuar kalimin e protestuesve, u hap menjëherë pas një konfrontimi verbal mes palëve. Në mesin e turmës ndodheshin vajza, gra, fëmijë dhe të moshuar, të cilët u përballën edhe me përdorimin e ujit nga policia. Megjithatë, qëndresa e protestuesve bëri që kjo pengesë të zbrapsej dhe marshimi të vijonte paqësisht drejt Kryeministrisë.
Përgjatë gjithë protestës u dëgjuan thirrje të ndryshme si: “Ju erdhi fundi”, “Dorëhiqu”, “Revolucion”, “Anuloni projektin”, “Rama burg – Berisha burg”, “Shqipëria e shqiptarëve” dhe slogane të tjera kundër klasës politike. Kërkesa kryesore mbeti anulimi i projektit të Zvernecit dhe mbrojtja e interesit publik.
Ajo që binte më shumë në sy ishte vullneti, energjia dhe qëndresa e të rinjve, të cilët nuk u larguan as kur reshjet e shiut përfshinë kryeqytetin. Në protestë morën pjesë edhe prindër e të moshuar, të cilët shprehën admirim për forcën dhe angazhimin e brezit të ri, që sipas tyre është lodhur nga problemet dhe padrejtësitë e grumbulluara ndër më shumë se tre dekada tranzicion.
“Pa llogaridhënie, pa transparencë po shitet gjithçka”, shprehej një nga protestuesit, ndërsa të tjerë theksonin se vendi u përket qytetarëve dhe se vendimmarrjet për pasuritë kombëtare duhet të bëhen me konsultim dhe transparencë.
Ndër të tjera, ata theksuan sërish që e kanë refuzuar ftesën e tij për t’u ulur për dialog.
“Edi Rama, të ka mbetur vetëm një vendim i fundit për të marrë, të japësh dorëheqjen. Koha jote e talljes me shqiptarët, me Kombinatin, Durrësin, Lezhën, Vlorën dhe e vjedhjes së Shqipërisë i erdhi fundi.
Ti je hajdut dhe kryehajdut, je tradhtar i Shqipërisë. Duhet të japësh dorëheqjen një orë e më parë.
Pa hequr dorë ti nga kjo zyrë, ne nuk do të largohemi. Do të rrimë këtu deri sa të thuash: “Jam i mbaruar”. Kam vetëm një fjalë për të gjithë shqiptarët e lodhur dhe të munduar nga Edi Rama, të qëndrojmë këtu deri sa të realizojmë dorëheqjen e Edi Ramës”, tha një prej qyetarëve.
“Është e qartë se është protestë e popullit, nuk ka nevojë për organizatorë. Jeni ju ata që bëni thirrje, që merrni vendimet. Ne nuk kemi grup dialogu për kryeministrin, dialogu është sheshi”, tha një tjetër.
Një tjetër objekt kritikash ishin edhe mediat e mëdha kombëtare. Protestuesit i akuzuan ato për mungesë vëmendjeje ndaj kauzës së tyre dhe për tendencën për ta paraqitur lëvizjen si të ndikuar nga interesa apo grupe të ndryshme. “Bojkotoni mediat”, ishte një nga thirrjet që u dëgjua në kor nga pjesëmarrësit, të cilët kërkonin më shumë hapësirë dhe trajtim të drejtë për zërin e tyre.
Pavarësisht motit dhe tensioneve të momentit, protesta u karakterizua nga pjesëmarrja masive, atmosfera paqësore dhe vendosmëria e qytetarëve për të mbrojtur atë që e konsiderojnë një çështje me rëndësi për të ardhmen e Zvernecit dhe të Shqipërisë.
Protesta u mbyll rreth orës 21:30 me thirrjen njëzëri të të gjithë protestuesve “Rama jep dorëheqjen” dhe “nesër më shumë”, duke i bërë thirrje sërish qytetarëve të bashkohen në të njëjtën orë dhe vend ditën e enjte, 4 qershor.
© 2026 Argumentum
