Të martën, “rimilitarizimi” i Japonisë bëri një hap tjetër të rrezikshëm: qeveria japoneze miratoi një rezolutë kabineti për rishikimin zyrtar të “Tre parimeve mbi transferimin e pajisjeve mbrojtëse”, duke lejuar parimisht eksportin e armëve vdekjeprurëse. Ky veprim theu kufizimet e mëparshme mbi eksportin e armëve joluftarake, duke shënuar një ndryshim të madh në politikën e sigurisë të Japonisë. Si përgjigje, bashkësia ndërkombëtare, duke përfshirë publikun japonez, ka shprehur kundërshtimin e ashpër dhe shqetësimin që kjo politikë do të acarojë garën rajonale të armatimeve dhe do të nxitë konfliktet ndërkombëtare, duke i sjellë kërcënime të reja botës tashmë të paqëndrueshme.
Japonia është vend i mundur në Luftën e Dytë Botërore. Dokumentet ligjore ndërkombëtare, si Deklarata e Kajros, Proklamata e Potsdamit, Instrumenti i Dorëzimit të Japonisë etj., e ndalojnë në mënyrë të qartë riarmatosjen e Japonisë. Pas luftës, Japonia miratoi “Tre parimet mbi eksportin e armëve” për të ndaluar rreptësisht eksportin e armatimeve. Megjithëkëtë, me fuqizimin vazhdimisht të forcave të djathta në Japoni, kjo politikë kufizuese është shkelur pandërprerë. Pas braktisjes së “Tre parimeve për eksportin e armëve” në vitin 2014 dhe miratimit të “Tre parimeve për transferimin e pajisjeve mbrojtëse”, qeveria japoneze ka publikuar shumë herë amendamente për të lehtësuar vazhdimisht kufizimet përkatëse të eksportit. Pasi Sanae Takaichi mori detyrën, “rimilitarizimi” i Japonisë është përshpejtuar më tej.
Ministria e Punëve të Jashtme e Kinës deklaroi se kundërshton me vendosmëri veprimet e pamatura të Japonisë për “militarizmin e ri”. Ndërkohë, Ministria e Punëve të Jashtme e Koresë së Jugut vuri në dukje që politika e mbrojtjes dhe e sigurisë e Japonisë duhet të shkojë në një drejtim që ndihmon paqen dhe qëndrueshmërinë rajonale, në bazë të frymës së “Kushtetutës Paqësore”. Zv.ministri i Jashtëm rus Andrey Rudenko u shpreh që ndjekja e vazhdueshme e “rimilitarizimit” nga Japonia ka ushtruar ndikim negativ mbi qëndrueshmërinë e Azi-Paqësorit, duke dëmtuar drejtpërdrejt interesat e sigurisë të vendeve fqinje.
Xiang Haoyu, studiues i posaçëm në Departamentin për Studimet e Azi-Paqësorit pranë Institutit të Studimeve Ndërkombëtare të Kinës, u shpreh se lehtësimi gjithëpërfshirës i eksporteve të armëve nga qeveria japoneze ka devijuar nga qëndrimi “pacifist” i Japonisë pas luftës dhe ka shkelur parimin e “mbrojtjes”, me qëllim që të nxitë ekonominë vendase, të fuqizojë industrinë e armatimeve dhe të zgjerojë ndikimin gjeopolitik. Veçanërisht në kushtet aktuale politike në Japoni, me forcat konservatore të krahut të djathtë në krye, procesi i vendimmarrjes për eksportin e armëve rishikohet nga kryeministrja, sekretari i përgjithshëm i kabinetit, ministri i Jashtëm e ministri i Mbrojtjes, dhe pas miratimit do të paraqitet në parlament. Kjo pa dyshim është projektuar për të përjashtuar “rezistencën”, duke përshpejtuar procesin e miratimit të eksportit të armëve.
Nga pretendimi i hapur se “një emergjencë në Tajvan mund të përbëjë një krizë mbijetese për Japoninë” te kalimi i destrojerit të Forcave të Vetëmbrojtjes nëpër Ngushticën e Tajvanit, nga bërja e homazheve nga Sanae Takaichi në tempullin “Yasukuni” me statusin e kryeministres te rritja e vazhdueshme e buxhetit ushtarak duke shënuar rekord, nga shtytja e rishikimit të kushtetutës në parlament te heqja e ndalimit të eksportit të armëve vdekjeprurëse me nxitjen e forcave ekstremiste të krahut të djathtë, “militarizmi i ri” në Japoni po shkakton trazira.
Japonia dikur u shkaktoi vuajtje të thella rajonit dhe botës, ndërsa tani po përshpejton “rimilitarizimin”. Bashkësia ndërkombëtare, veçanërisht vendet fqinje, duhet të mbajnë vigjilencën dhe të bashkohen për t’i rezistuar me vendosmëri “militarizmit të ri” të Japonisë, duke ndaluar rreptësisht rifillimin e makinës së luftës nga Japonia, për të mbrojtur së bashku paqen dhe qetësinë rajonale e botërore./cgtn
