Rritja e eksporteve të vajit të ullirit, lançohet nisma e ngritjes së kapaciteteve të sektorit

Nisma po zhvillohet nën kujdesin e veçantë të ministres së Bujqësisë dhe Zhvillimit Rural  Frida Krifca, si dhe me mirëkuptimin e homologut të saj italian Françesko Lolobrixhida, gjithashtu edhe me pjesëmarrjen e institucioneve të varësisë së MBZHR, Agjencitë Rajonale të Ekstensionit Bujqësor (AREB), qendrat e transferimit të teknologjisë (QTTB), si dhe në bashkëpunim me organet e pushtetit vendor.

Synimi kryesor i këtij bashkëpunimi është të përmirësojë e konsolidojë shitjen e vajit të ullirit në tregun e vendit dhe të nxisë eksportin e tepricave të vajit të ullirit në vendet e BE-së dhe vendet që blejnë me çmime të larta. 

Kjo iniciativë është në vazhdën e politikave mbështetëse që ka ndërmarrë MBZHR për vajin e ullirit, i cili vitin e kaluar u përball me superprodhim dhe thuajse mbeti stok për shkak të çmimit nën kosto.

Ministrja e Bujqësisë dhe Zhvillimit Rural, Frida Krifca zhvilloi takime me homologun italian Françesko Lolobrixhida dhe nënshkroi disa marrëveshjeve të bashkëpunimit në mbështetje të zgjerimit të eksportit të vajit të ullirit në tregun italian dhe europian.

Efektet e këtij bashkëpunimi kanë dhënë rezultate të prekshme në rritjen e eksportit të vajit të ullirit, ku vetëm në 4 muajt e parë të 2023 janë eksportuar mbi 1258 tonë vaj ulliri kundrejt 326 tonëve që u eksportuan gjatë vitit 2022.

Në përpjekje të vazhdueshme për të mbështetur fermerët dhe sektorin në tërësi, MBZHR, po vijon të zbatojë strategjinë e financimit të fermerëve me subvencione dhe programe të tjera, për uljen e kostos prodhuese dhe rritjen e eksporteve si vlerë e shtuar e ekonomisë.

“Ulliri është një pasuri e çmuar kombëtare dhe ne jemi të angazhuar me të gjitha forcat dhe kapacitetet tona për ta forcuar këtë sektor dhe për t’i orientuar prodhuesit e ullirit për mbledhjen dhe certifikimin e këtij produkti duke iu vënë në dispozicion fonde dhe linjat e nevojshme të prodhimit dhe të përpunimit”, u shpreh Krifca.