Dr. Gurakuç Kuçi, ekspert i luftës hibride dhe hulumtues në Institutin për Studimet e Luftës Hibride “Octopus”, ka komentuar arrestimet e fundit të Serbisë ndaj dy shqiptarëve dhe një qytetari serb të Kosovës, duke i cilësuar ato si veprime të motivuara politikisht dhe pa bazë të fortë. Sipas tij, arrestimet kanë ndodhur pas dekonspirimit të një grupi agjentësh të shërbimit inteligjent serb (BIA), të cilët ishin aktivë në Kosovë.
Kuçi theksoi se arrestimi i Arbnor Spahiut, i cili akuzohet për “vrasje të rëndë” lidhur me incidentin në Banjskë në shtator 2023, është i pabazuar, pasi ai ka dhënë dorëheqje nga Policia e Kosovës që në vitin 2022. Po ashtu, arrestimi i Lulzim Halilit, i akuzuar si ish-pjesëtar i UÇK-së, është po ashtu pa baza, pasi ai nuk ka qenë pjesëtar i Ushtrisë Çlirimtare të Kosovës dhe nuk figuron në asnjë listë të veteranëve.
Përveç këtyre, Kuçi e sheh arrestimin e një qytetari serb nga Kosova, Sasha Gjorgjeviq, si një tjetër tentativë të Serbisë për të dekonspiruar rrjetet e spiunazhit dhe për të krijuar një atmosferë frike. Gjorgjeviqi u akuzua për spiunazh në favor të AKI-së dhe SHISH-it të Shqipërisë.
Dr. Kuçi nënvizon se këto arrestime janë një përgjigje e Serbisë ndaj dekonspirimit të rrjeteve të saj të spiunazhit në Kosovë dhe më gjerë. Sipas tij, Serbia po përpiqet ta paraqesë këtë si një përplasje të zakonshme mes shërbimeve inteligjente, për të minimizuar rëndësinë e zbulimeve dhe për të shmangur presionin ndërkombëtar.
Komenti i plotë i Dr. Gurakuç Kuçi
Serbia ka arrestuar dy shqiptarë të cilët kalonin nëpër territorin serb me akuza që janë fiktive, ku njërin e akuzon për “vrasje të rëndë” për rastin e shtatorit 2023 në Banjskë, dhe tjetrin si ish-pjesëtar të UÇK-së. Por në rastin e policit, ai nuk është në shërbim që nga viti 2022, ndërsa në rastin e dytë, ai nuk ka qenë fare pjesëtar i luftës apo veteran.
Ndërsa, për ta treguar panikun e tyre, së fundi arrestojnë edhe një qytetar serb të Kosovës.
Këto arrestime nga Serbia erdhën pasi institucionet e sigurisë dhe drejtësisë në Kosovë arritën të dekonspirojnë të paktën 6 agjentë të cilët punonin për BIA-në serbe, dhe një nga të arrestuarit, Aleksandër Vllajiq, ka pranuar fajësinë.
Ky dekonspirim i strukturave serbe të spiunazhit ka futur në panik Serbinë, e cila ka filluar një valë arrestimesh të shqiptarëve dhe, së fundmi, edhe të një serbi – të motivuara politikisht dhe pa argumente.
Serbia arrestoi Arbnor Spahiun nën akuzën për vrasje të rëndë në shtator 2023, në rastin e Banjskës, ku Serbia kreu sulm terrorist. Mirëpo, Arbnor Spahiu ka dhënë dorëheqje nga Policia e Kosovës që nga viti 2022, apo rreth një vit më parë, para rastit të Banjskës.
Arrestimi i Lulzim Halilit nga Serbia si ish-pjesëtar i UÇK-së është dëshmuar se është vetëm një arrestim i motivuar politikisht, pasi i njëjti nuk ka qenë pjesëtar i UÇK-së dhe nuk figuron në asnjë listë të veteranëve.
Serbia ka arrestuar edhe një qytetar serb të Kosovës, Sasha Gjorgjeviq, nga Shtërpca, punonjës në një qendër shëndetësore lokale, me akuzën për spiunim në favor të AKI-së së Kosovës dhe SHISH-it të Shqipërisë.
Në të tria rastet, Serbia po tenton të bëjë një lloj hakmarrjeje dhe frikësimi, për të ndalur dekonspirimin e rrjeteve të spiunazhit serb dhe për t’u hakmarrë ndaj qytetarëve që e kanë Serbinë si rrugë tranziti.
Po ashtu, Serbia po përpiqet ta paraqesë këtë dekonspirim të strukturave të saj si një përplasje të zakonshme mes shërbimeve inteligjente, për ta relativizuar rrezikun dhe për ta neutralizuar diskursin ndërkombëtar.
Kjo strategji synon të shmangë përballjen me pasojat e infiltrimit të saj të thellë në territorin e Kosovës, pasi një hetim më i thelluar do të zbulonte se Serbia është pjesë aktive e rrjeteve destabilizuese që veprojnë në nivel ndërkombëtar, sikurse është vërtetuar në rastet e ndërhyrjeve të ndikuara nga Serbia dhe aleatët e saj në Francë, Moldavi dhe vende të tjera.
Kjo e pozicionon Serbinë jo thjesht si problem bilateral me Kosovën, por si një faktor që po prodhon pasiguri në shkallë globale.
/Argumentum.al
