Ekipi i taskforcës së Autoritetit Kombëtar të Ushqimit ka nisur punën për të garantuar sigurinë ushqimore përgjatë sezonit veror, ku konsumi është dhe më i lartë.
Ministrja e Bujqësisë dhe Zhvillimit Rural, Frida Krifca ishte sot e pranishme për të ndjekur punën e kësaj taskforce në bregdetin e Durrësit, bashkë me kryetaren e Bashkisë, Emirjana Sako.
“Taskforca e AKU-së për sezonin veror, e krijuar si pjesë e taskforcës kombëtare me urdhër të kryeministrit, ka nisur në 26 qershor dhe do të jetë aktive deri në fund të shtatorit. Janë 100 inspektorë të ndarë në 35 grupe dhe të shpërndarë në të 12 qarqet.
Masat do të kenë të njëjtën rëndësi si në zonat bregdetare ashtu dhe ato fushore e malore. Pra intensiteti i vëmendjes do jetë si në bregdet në Durrës, Lezhë, Vlorë apo Sarandë, ashtu dhe në Tiranë, Berat, Krujë, Shkodër, Korçë apo Gjirokastër. Nga analiza e riskut janë përzgjedhur 6000 subjekte të cilat do të mbikëqyren ku bëjnë pjesë hotele, restorante, pastiçeri apo supermarkete”, u shpreh Krifca.
Krifca bëri me dije se rastet e shkeljeve të përsëritura nuk do të tolerohen dhe do të referohen tek organet e drejtësisë.
Ndërsa Jeta Deda, drejtoresha e Përgjithshme e AKU-së u shpreh se objektivat kryesorë të këtyre kontrolleve janë këshillimi dhe garantimi i kushteve të duhura të tregtimit.
Objekt i kontrolleve do të jenë kushtet higjieno-sanitare, kushtet e magazinimit dhe tregtimit dhe zbatimi i legjislacionit për sa i përket sigurisë së produkteve ushqimore.
Taskforca do të jetë në terren deri në fund të shtatorit, kohë që përkon me mbylljen e sezonit veror.
