Ministri italian i Punëve të Jashtme dhe Bashkëpunimit Ndërkombëtar pritet të vijë në Tiranë.
Lajmi konfirmohet nga ambasada italiane e cila shprehet se Luigi Di Maio do të vizitojë nesër Shqipërinë.
“Ministri i Punëve të Jashtme dhe i Bashkëpunimit Ndërkombëtar, Luigi Di Maio, ditën e mërkurë datë 11 dhjetor, do të kryejë një vizitë në Shqipëri gjatë së cilës do të takohet me Presidentin e Republikës së Shqipërisë, Ilir Meta, dhe me Kryeministrin dhe Ministrin e Punëve të Jashtme, Edi Rama” – thuht në njoftim.
Në përfundim të takimit me Kryeministrin Rama pritet që të mbahet edhe një konferencë e përbashkët për shtyp pranë Këshillit të Ministrave të Republikës së Shqipërisë.
“Pas tërmetit të fortë që goditi Shqipërinë në datën 26 nëntor, Ministri Di Maio do të kryejë një vizitë edhe në kampin e çadrave pranë qytezës së Vorës si dhe do të marrë pjesë në ceremoninë e dhurimit të materialeve të nevojshme të shpëtimit për të përballuar katastrofat dhe situatat e emergjencës të dhuruara nga Emergjencat Civile italiane” – njofton Ambasada e Italisë.
