Presidenti i SHBA-së, Donald Trump tha se është thellësisht i zhgënjyer nga Presidenti rus, Vladimir Putin dhe njoftoi se do të shkurtojë afatin 50-ditor që ka vendosur më parë për armëpushimin në Ukrainë, transmeton Anadolu.
Trump u takua me kryeministrin e Britanisë së Madhe, Keir Starmer gjatë një vizite në Skoci për të vizituar resortet e tij të golfit dhe iu përgjigj pyetjeve të mediave para takimit.
Në përgjigje të pyetjes mbi pretendimet e kryeministrit izraelit, Benjamin Netanyahu se nuk ka uri në Gaza, Trump tha se: “Bazuar në atë që shoh në televizion, nuk do të thoja se ka, sepse ata fëmijë duket që janë shumë të uritur, por ne po japim shumë para dhe shumë ushqim. Tani edhe vende të tjera po kalojnë në veprim”.
Duke theksuar se edhe vendet e tjera duhet të kontribuojnë për të ndihmuar Gazën, Trump tha se gjatë bisedës së tij dje me presidenten e Komisionit Evropian, Ursula von der Leyen, ajo i ka thënë atij se vendet evropiane do ta rrisnin “ndjeshëm” mbështetjen e tyre.
– “Putin më ka zhgënjyer shumë”
Në përgjigje të një pyetjeje në lidhje me çështjen Rusi-Ukrainë, Trump deklaroi se Putin e ka zhgënjyer shumë.
“Kam folur me Putinin shumë herë. Më parë shkoja shumë mirë me të, por kemi pasur debate pesë herë, ndoshta katër herë në të njëjtën kohë. Unë dhe ti (Starmer) e kemi diskutuar këtë çështje shumë herë, duke menduar se e kemi zgjidhur. Mendonim se e kishim zgjidhur shumë herë, por pastaj vjen presidenti Putin dhe fillon të qëllojë me raketa një qytet si Kievi, duke vrarë shumë njerëz në një azil pleqsh ose diku tjetër. Ka trupa të shtrirë në rrugë dhe po them se kjo nuk është mënyra e duhur për të vazhduar. Do të shohim se çfarë ndodh. Jam shumë i zhgënjyer. Presidenti Putin më ka zhgënjyer shumë mua. Pra, do të duhet ta shqyrtojmë dhe unë do ta shkurtoj periudhën 50-ditore që i dhashë, sepse tashmë e di se çfarë do të ndodhë”.
Më 14 korrik, presidenti amerikan Trump tha se nëse Rusia nuk mund të arrinte një marrëveshje me Ukrainën brenda 50 ditëve, ai do të rriste taksat me 100 për qind.
