Ditët e fundit, shumë udhëheqës të vendeve të ndryshme dhe drejtues të organizatave ndërkombëtare i kanë dërguar telegrame ose letra Xi Jinping-ut, sekretar i përgjithshëm i Komitetit Qendror të Partisë Komuniste të Kinës (PKK) dhe president i Republikës Popullore të Kinës, për ta uruar popullin kinez me rastin e Vitit të Ri të Kalit.
Presidenti i Hungarisë Sulyok Tamas dhe kryeministri Viktor Orban thanë se Hungaria i çmon arritjet e jashtëzakonshme në zhvillimin e marrëdhënieve dypalëshe me Kinën. Kali zë një pozicion thelbësor në historinë e kulturën tradicionale hungareze dhe Hungaria është e gatshme të përpiqet bashkë me Kinën në Vitin e Kalit për të promovuar zhvillimin e vazhdueshëm të partneritetit të gjithanshëm strategjik në të gjitha rrethanat në epokën e re.
Pamja në bulevardin Qianmen të Pekinit gjatë Festës së Pranverës 2026 / VCG
Presidenti i Komoreve Azali Assoumani i uron Kinës të ushtrojë ndikim më të madh në skenën ndërkombëtare, të vazhdojë të realizojë arritje të reja në rrugën e duhur të ndjekjes së interesave të përbashkët të popullit kinez e të gjithë njerëzimit, si edhe të promovojë paqen e zhvillimin botëror.
Presidenti i Gabonit Brice Clotaire Oligui Nguema tha që Festa e Pranverës ka një histori të gjatë dhe simbolizon harmoninë e shpresën, ndërsa Gaboni pret të forcojë marrëdhëniet miqësore dhe bashkëpunuese me Kinën dhe të përpiqet bashkërisht për të realizuar zhvillimin e lulëzimin.
Pamja në Makao gjatë Festës së Pranverës 2026 / VCG
Presidenti i Sejshelleve Patrick Herminie theksoi që ky vit shënon 50-vjetorin e vendosjes së marrëdhënieve diplomatike midis Sejselleve dhe Kinës, duke shprehur besimin se marrëdhëniet dypalëshe do të vazhdojnë të lulëzojnë dhe miqësia midis dy vendeve do të zhvillohet me gjallëri të re. Ai i uron popullit kinez arritje më të lavdishme në zhvillimin kombëtar.
Presidenti i Botsvanës Duma Boko vlerëson lart promovimin nga Kina të qeverisjes globale e të lulëzimit të përbashkët dhe shpreson që dy vendet të thellojnë më tej miqësinë dhe bashkëpunimin strategjik midis tyre.
Pamja në pikën turistike rreth Tempullit Konfuci në qytetin Nankin të Kinës Lindore gjatë Festës së Pranverës 2026 / VCG
Presidenti i Somalisë Hassan Sheikh Mohamud tha se Kina i përmbahet filozofisë së zhvillimit me popull në qendër, fokusohet në zhvillimin me cilësi të lartë, ka hartuar planin e 15-të pesëvjeçar dhe ka treguar një vizion strategjik afatgjatë. Pala somaleze e admiron thellësisht këtë dhe është e gatshme të bashkëpunojë ngushtë me palën kineze për të promovuar zhvillimin. Ai i uron Kinës paqe, qetësi dhe begati.
Presidenti i Afrikës Qendrore Faustin-Archange Touadéra tha se vendi i tij e ka konsideruar gjithmonë Kinën si një partnere të besueshme strategjike, ka mbështetur fuqimisht katër nismat globale të Kinës dhe është i gatshëm të bashkëpunojë me Kinën për të zbatuar multilateralizmin dhe për të promovuar paqen e zhvillimin botëror.
Pamja në një panair tempulli në qytetin Qinhuangdao në provincën Hebei të Kinës Veriore gjatë festës së pranverës /VCG
Presidenti i Serbisë Aleksandar Vuçiç, presidenti i Mongolisë Ukhnaagiin Khurelsuh, presidenti i Armenisë Vahagn Khachaturyan, presidenti i Iranit Masoud Pezeshkian, sulltani i Omanit Haitham Bin Tariq Al-Said, presidenti i Izraelit Isaac Herzog, presidenti i Tunizisë Kais Saied dhe presidenti i Austrisë Alexander Van der Bellen gjithashtu i dërguan telegrame ose letra presidentit Xi Jinping për Vitin e Ri, duke i uruar popullit kinez lumturi e shëndet dhe Kinës lulëzim e përparim të vazhdueshëm./cgtn
