Byroja Politike e Komitetit Qendror të Partisë Komuniste të Kinës (PKK) mbajti të premten një mbledhje për të diskutuar një sërë rregulloresh pune, që kanë të bëjnë me punën ideologjike e politike të Partisë, si edhe për të studiuar një projektligj për të nxitur unitetin dhe përparimin etnik.
Mbledhja u kryesua nga sekretari i përgjithshëm i Komitetit Qendror të PKK-së Xi Jinping.
Duke e pranuar rëndësinë e rregulloreve, në mbledhje u bë thirrje për forcimin dhe përmirësimin e punës ideologjike e politike në rrethanat e reja, duke u përshtatur me zhvillimin dhe ndryshimin e shoqërisë dhe duke rritur saktësinë e efektivitetin. Po ashtu, u theksua nevoja për të ruajtur dhe forcuar udhëheqjen e gjithanshme të Partisë në këtë fushë.
Lidhur me projektligjin për nxitjen e unitetit dhe përparimit etnik, u vu në dukje që qëllimi i tij është forcimi i mëtejshëm i unitetit dhe kohezionit të kombit kinez.
Mbledhja theksoi nevojën për të konsoliduar themelin e përbashkët ideologjik e politik për përpjekjet e përbashkëta të të gjitha kombësive, për të krijuar një ndjenjë të fortë bashkësie të kombit kinez dhe për të promovuar më tej begatinë dhe zhvillimin e përbashkët të të gjitha kombësive.
Mbledhja parashtroi gjithashtu kërkesat për të përmirësuar më tej sigurinë në punë, si edhe parandalimin e fatkeqësive, duke vënë në dukje që siguria e jetës së njerëzve duhet të jetë gjithmonë e para dhe se zhvillimi nuk duhet të vijë kurrë në kurriz të sigurisë.
Po ashtu, u theksua që duhet të bëhet çdo përpjekje për të kryer shpëtimet emergjente dhe për të dhënë ndihmë në raste fatkeqësie, si edhe për të zhvendosur menjëherë dhe siç duhet njerëzit e prekur./cgtn
