Të martën paradite, Presidenti i Kinës Xi Jinping zhvilloi bisedime në Sallën e Madhe të Popullit në Pekin me Presidentin e Mianmarit Min Aung Hlaing, i cili ndodhet në Kinë për një vizitë shtetërore.
Xi Jinping theksoi se Kina dhe Mianmari ndajnë një miqësi të thellë. Për 76 vjet që nga vendosja e marrëdhënieve diplomatike, ato kanë qëndruar së bashku në të mira dhe të keqe, duke mbështetur njëra-tjetrën, duke mbrojtur dhe praktikuar së bashku Pesë Parimet e Bashkëjetesës Paqësore, duke vendosur një model barazie dhe përfitimi të ndërsjellë midis vendeve. Kina i përmbahet parimeve të miqësisë, sinqeritetit, përfitimit të ndërsjellë dhe përfshirjes, duke e vendosur zhvillimin e marrëdhënieve me Mianmarin në një pozicion të rëndësishëm në diplomacinë e saj të fqinjësisë. Kina mbështet fuqimisht Mianmarin në mbrojtjen e sovranitetit dhe integritetit të tij territorial dhe mbështet qeverinë e re të Mianmarit në koordinimin e zhvillimit dhe sigurisë për të gjetur një rrugë të saktë zhvillimi që i përshtatet kushteve të saj kombëtare dhe mbështetet nga populli i saj.
Xi u shpreh gjithashtu se ky vit shënon fillimin e Planit të 15-të Pesëvjeçar të Kinës. Kina është e gatshme të ndajë përvojën e saj të zhvillimit me Mianmarin dhe të ndërtojë së bashku një komunitet Kinë-Mianmar me një të ardhme të përbashkët, të karakterizuar nga miqësia politike dhe besimi i ndërsjellë, zhvillimi i dobishëm për të dyja palët, siguria e koordinuar, shkëmbimi kulturor dhe mësimi i ndërsjellë, duke sjellë më shumë përfitime për popujt e dy vendeve dhe duke dhënë kontribute më të mëdha në paqen dhe zhvillimin rajonal.
Xi Jinping theksoi se Kina është vendi fqinj i Mianmarit me kufirin më të gjatë të përbashkët dhe një mik dhe partner i besueshëm. Përballë një situate ndërkombëtare komplekse dhe të paqëndrueshme, të dyja palët duhet të ruajnë qartësinë dhe qetësinë strategjike, si dhe të forcojnë solidaritetin dhe bashkëpunimin. Korridori Ekonomik Kinë-Mianmar është një projekt kryesor i nismës “Një brez, një rrugë”. Të dyja palët duhet të përparojnë vazhdimisht ndërtimin e projekteve kyçe, duke garantuar sigurinë, duke kontribuar në zhvillimin ekonomik të Mianmarit dhe duke përmirësuar jetesën e njerëzve.
Xi tha gjithashtu se Kina është e gatshme të rrisë mbështetjen e saj për rindërtimin e Mianmarit pas tërmetit, të zbatojë ndihmë më të synuar dhe të tregojë së bashku historinë e bashkëpunimit të dobishëm për të dyja palët midis Kinës dhe Mianmarit. Të dyja palët duhet të vazhdojnë të godasin lojërat e fatit online, mashtrimet në telekomunikacion, trafikun e drogës dhe aktivitete të tjera kriminale, për të mbrojtur në mënyrë efektive interesat dhe sigurinë e popujve të të dy vendeve. Kina mbështet të gjitha palët në Mianmar në promovimin e paqes dhe pajtimit përmes negociatave, për të arritur paqe dhe stabilitet të qëndrueshëm në Mianmarin verior, gjë që është në interesat themelore dhe afatgjata të vendit dhe popullit të Mianmarit.
Min Aung Hlaing u shpreh se miqësia midis Mianmarit dhe Kinës ka një histori të gjatë, me të dyja palët që ndihmojnë dhe mbështesin vazhdimisht njëra-tjetrën, duke iu përmbajtur Pesë Parimeve të Bashkëjetesës Paqësore dhe duke krijuar një partneritet të fortë fqinjësie, për të ecur drejt një faze të re të ndërtimit të një komuniteti me një të ardhme të përbashkët. Mianmari shprehu mirënjohje ndaj Kinës për mbështetjen afatgjatë dhe vetëmohuese në zhvillimin, stabilitetin, paqen dhe pajtimin e Mianmarit, si dhe u zotua t’i përmbahet fort parimit të një Kine. Qeveria e re e Mianmarit po bën çdo përpjekje për të promovuar paqen dhe zhvillimin e brendshëm, duke eksploruar në mënyrë aktive një sistem politik dhe një rrugë zhvillimi të përshtatshme për kushtet e saj kombëtare.
Min Aung Hlaing tha se zbatimi i Planit të 15-të Pesëvjeçar nga Kina, ka ofruar mundësi të konsiderueshme për vendet fqinje aziatike, përfshirë Mianmarin. Mianmari pret me padurim forcimin e bashkëpunimit të gjithanshëm me Kinën, ndërtimin e përbashkët të Korridorit Ekonomik Mianmar-Kinë dhe rritjen e niveleve të tregtisë dhe investimeve. Mianmari i kushton rëndësi të madhe dhe do të bëjë çmos për të garancuar sigurinë e ndërmarrjeve dhe personelit të financuar nga kinezët në Mianmar. Mianmari është i gatshëm të punojë ngushtë me Kinën për të luftuar me vendosmëri lojërat e fatit online dhe mashtrimet në telekomunikacion, si dhe për të ruajtur sigurinë dhe stabilitetin kufitar. Mianmari mbështet plotësisht katër iniciativat globale të propozuara nga Presidenti Xi Jinping dhe është i gatshëm të forcojë komunikimin dhe bashkëpunimin shumëpalësh me Kinën.
Pas bisedimeve, krerët e dy vendeve ndoqën së bashku nënshkrimin e disa dokumenteve të bashkëpunimit në fusha të tilla si transporti dhe jetesa e njerëzve.
Para bisedimeve, Xi Jinping mbajti një ceremoni mirëseardhjeje për Min Aung Hlaing në Sallën Veriore të Sallës së Madhe të Popullit.
Atë mesditë, Xi Jinping organizoi një banket mirëseardhjeje për Min Aung Hlaing në Sallën e Artë të Sallës së Madhe të Popullit./CGTN
