Prej zgjedhjeve parlamentare të vitit 2013, akuzat për lidhje të politikës me krimin dhe përfshirjen e grupeve kriminale në zgjedhje kanë qenë pjesë dominante e debatit politik në Shqipëri.
Partia Demokratike në opozitë i intensifikoi akuzat në zgjedhjet vendore të vitit 2015 dhe veçanërisht gjatë fushatës për zgjedhjet e 25 qershorit 2017-kur Partia Socialiste mori e vetme mandatin për të qeverisur vendin. Aludimet për blerje të votës u reflektuan edhe në raportin e fundit të OSBE/ODIHR-it.
Dosja 184, ajo e manipulimit të votave në Dibër ka qenë “patatja e nxehtë” e kësaj të hënë, ndërsa 16 audio-përgjime janë publikuar nga gazeta gjermane Bild, ku përfshihet dhe kryeministri Edi Rama.
Vete Kryeministri Edi Rama reagoi sot ndaj përgjimeve të publikuara nga “Bild” duke nxitur prokurorinë të vijojë intensivisht hetimet.
“Ky është i gjithi një skandal i turpshëm, i gatuar nga shërbëtori famëkeq i Saliut në prokurori + një birbo tjetër që doli cullak nga Vetingu, të cilët jo vetëm kanë shkelur ligjin për sekretin hetimor, duke i përdorur përgjimet për shantazhe e lojë politike, po s’kanë hetuar asgjë!”, tha Rama.
Në një prej përgjimeve të publikuara nga “Bild”, Kryeministri Rama dëgjohet duke folur në telefon me Arben Keshin, i cili sipas “Bild” është zyrtar në Ministrinë e Brendshme dhe personi i ngarkuar me fushatën elektorale.
Në përgjim rezulton se Flamur Noka me 50 të tjerë, prisnin te dera e hotelit komisionerin e PS, për t’i bërë presion.
Në përgjim duket qartë se i angazhuari i PS në zgjedhje ankohet për presion nga ish-ministri i Brendshëm i PD-së Flamur Noka, madje për një pritë që demokratët i kanë bërë në hotel.
“Nxis Prokurorinë të vijojë intensivisht hetimet për të nxjerrë deri në fund ku mbarojnë llafet dhe ku dalin prova fajësie para ligjit, nëse ka të tilla. Por sidoqoftë, kjo ndërmarrje kriminale për të helmuar dynjanë, do ta marrë përgjigjen e merituar në 30 qershor e më tej akoma!” – tha Kryeministri.
“Përgjimet e pahetuara të shërbëtorit të Saliut tregojnë përsëri se u bënë për shantazh, jo për drejtësi! Dhe u mbajtën tek partia për këtë ditë të zezë, kur duhet sulmuar Shqipëria me “zbulime gjermane”, për të bllokuar negociatat dhe ndaluar drejtësinë që vjen me kapitujt 23/24”, theksoi Kryeministri Rama.
