Një operacion i përbashkët mes autoriteteve shqiptare dhe italiane u zhvillua këtë të mërkurë në disa qytete të vendit, përfshirë Tiranën, Durrësin, Fierin dhe Vlorën, në kuadër të hetimeve për trafik ndërkombëtar droge dhe pastrim parash.
Operacioni i koduar “Ura” është fokusuar në goditjen e një rrjeti të strukturuar kriminal që dyshohet për trafik heroine dhe kokaine nga Ballkani drejt vendeve të Bashkimit Evropian.
Burime nga grupi hetimor bëjnë me dije se janë lëshuar 52 urdhër-arreste në Shqipëri dhe Itali me akuzat për trafik droge, shpërdorim detyre dhe pastrim parash ndërsa janë sekuestruar pasuri me vlerë miliona euro.
Në aksionin e shtrirë në disa qytete morën pjesë forcat e rendit, agjentët e Byrosë Kombëtare të Hetimit (BKH), si dhe përfaqësues të antimafias italiane ndërsa hetimet ndiqen nga prokurori i SPAK Vladimir Mara.
Sipas mediave italiane, në listën e urdhër-arresteve ka edhe punonjës policie, avokatë dhe emra të njohur të botës së krimit, të dyshuar për përfshirje në rrjetin e trafikut dhe për shpërdorim detyre.
Drejtuesi i Përgjithshëm i Prokurorisë së Posaçme Kundër Krimit të Organizuar dhe Korrupsionit, Altin Dumani zhvilloi sot një konference të përbashkët për shtyp me kryeprokurorin e Barit Roberto Rossi, drejtorin e Antimafias italiane Michele Carbone dhe përfaqësuesin e ‘Eurojust’ për Italinë Gianluca Forlani.
Kreu i SPAK bëri publike rezultatet e një hetimi të përbashkët mes SPAK, autoriteteve italiane, Prokurorisë së Barit dhe drejtorisë së antimafias italiane, ndërsa theksoi se ky operacion përfaqëson një hap të rëndësishëm në luftën e përbashkët kundër krimit transnacional.
“Është arritur t’i jepet një goditje e rëndësishme një prej grupeve kriminale më të fuqishme në Shqipëri, për të cilin ka dyshime të forta që ishte i përfshirë në trafikun e drogave të forta dhe pastrimin e parave. Ky operacion i mbështetur nga hetime të thelluara dhe një shkëmbim informacioni ndërinstitucional është një dëshmi e qartë e asaj që mund të arrihet kur institucionet e drejtësisë dhe strukturat e zbatimit të ligjit bashkëpunojnë me besim të ndërsjellë, profesionalizëm dhe përkushtim”, tha Dumani.
/Argumentum.al
