Çmenduri politike! 5 për qind ose ndryshe mësoni rusisht! Lindja e Zjarrtë!
REAL POLITIK NR. 109
1 – 16 QERSHOR 2025
Komente “ flash” mbi 4 ngjarjet kryesore diplomatike, shkurt dhe shqip, vetëm me 1000 fjalë nga analisti i njohur,
DR. JORGJI KOTE
1.Kancelari Merz e “kaloi provimin“! Mund tëtingëllojë eçuditshme, por takimi i Kancelarit gjerman Friedrich Merz më 6 Qershor në Shtëpinë e Bardhë me Presidentin Trump ishte vërtet test i madh shkollor politik! Si ish diplomat në Berlin dhe falë gjermanishtes, ndoqa stresin, emisionet dhe pikpyetjet e shumta lidhur me përgatitjet paraprake të “Studentit Merz“ në muajin e parë si Kancelar përballë “Profesorit“ të tij President të paparishikueshëm Trump: Përpara fluturimit në Uashington, Merz telefonoi homologët britanikë, francezë, italianë, dhe Presidentin Zelenski pas takimit slandaloz më 28 Shkurt në Zyrën Ovale për të dëgjuar sugjerimet e tyre taktike; ai bisedoi me psikologë dhe ekspertë të gjuhës së trupit, deri si ta thoshte sa më bukur dhe “Thank you“! Këshilltarët e tij më të afërt kaluan netë pa gjumë, duke vrarë mendjen për çdo situatë që mund të krijohej dhe si të dilej “pa u lagur“. Gjithashtu, Merz kishte me vehte një garderobë me 16 kostume për t’i patur për çdo rast.
Në fakt, Merz ishte me shumë fat për atë “provim“. Ditën e takimit ishte njoftuar prishja e miqësisë së Trump me Elon Musk. Nga ana tjetër, gjesti i Trump për ta akomoduar Mercin në Shtëpinë Presidenciale “Blair“ ishte mesazh dhe ogur i mirë për takimin në fjalë. Hyrja më e bukur në bisedën e tyre ishte padyshim zgjedhja domethënëse e dhuratës, akti origjinal gjerman i lindjes së gjyshit të Trump, Friedrich që në Amerikë e kishte kthyer në Frederik që e preku Trumpin.
Ashtu si Trump, Merz kishte punuar 10 vjet si afarist me firmë të njohur amerikane, çka Trump e çmon. Shto këtu dhe faktin që falë anglishtes së kënaqshme, dhe në shenjë mirësimi ndaj bashkëbiseduesit, Merz nuk mori përkthyes. Trump e vlerësoi këtë, duke nënvizuar aksentin e këndshëm gjerman të anglishtes së Merz.
Kësisoj, dhe me “revolucionin“ e tij në fushën e mbrojtjes, duke shpallur Gjermaninë si fuqia e ardhëshme më e madhe ushtarake në Europë dhe realizimin e objektivit prej 5 për qind të GDP-së për shpenzimet mbrojtëse, Merz e kishte siguruarpothuajse të kaluar testin.
Merz nuk bëri asnjë gabim; kjo dhe për faktin se gjatë 45 minutave të takimit, ai foli vetëm 4 minuta, për shkak të monologimit të vazhdueshëm të Trump. Merz e kaloi me finesë dhe ndërhyrjen pa takt të Trump për operacionin e famshëm ushtarak të aleatëve në Normandi duke e quajtur “ditë të keqe për gjermanët“, me mirënjohje për SHBA-të që çliruan Gjermaninë dhe se ajo kishte në dorë dhe fundin e luftës në Ukrainë. Pranimi i ftesës për vizitën në Gjermani nga Trump ishte “qershiza mbi tortën“ e takimit. Shkurt hesapi, Merz e “kaloi provimin“ me notë pothuajse të shkëlqyer. Sa për përmbajtjen e bisedës, Ukrainën, Lindjen e Mesme, tarifat doganore, ato pak rëndësi kishin në atë takim. Përcaktuese ishe forma, që Merz doli i nderuar, duke shmangur çdo incident, duke e mbajtur mirë të paktën dhe për ca kohë me Trumpin. Gjithsesi, ekspertët paralajmërojnë Kancelarin Merz se herën tjetër duhet të takohet me Trump jo më për të marrë një “dëftesë pjekurie“ por me përmbajtje dhe arritje të dukshme; mirëpo, kjo kërkon një Gjermani shumë më të fortë ekonomikisht, politikisht dhe ushtarakisht.
2.Çmenduri politike është kjo që po ndodh në Prishtinën zyrtare. Edhe raundi i 32 për zgjedhjen e Kryetarit të Kuvendit dështoi. Pa asnjë shans dhe perspektivë, vetëm inat, ”tërheqje litari” dhe skenarë jashtë realitetit. Më parë këtë e kemi quajtur ”turp politik” por tani kjo është çmenduri politike. Dhe ndodh tamam kur Kosova po kërkon të hyjë në KiE, të çelë negociatat me BE-në, etj. Kur duket se i mungojnë elementët jetikë të vlerave dhe parimeve Euro-Atlantike – fryma e tolerancës, lëshimit, kompromisit dhe konsensusit mbarëpartiak. Mirëpo pa këto komponentë, të tjerat janë ” pesë me hiç”. Padyshim që fajtori kryesor është shumica parlamentare, e cila këmbëngul ”më keq se mushka” për kandidaturën e saj. Kjo nuk ka ndodhur as në vendet më të prapambetura afrikane. Çfarë dhurate e bukur për Beogradin, për ta telendisur akoma më keq Prishtinën lidhur me njohjen, asociacionin, etj. Mendoni thonë ata nëpër botë, kur këta nuk zgjedhin dot kryetaren e Kuvendit, si mund të merremi vesh me ta? I rroftë Presidentes Osmani që po i bie botës kryq e tërthor botës, pa e kuptuar se të keqen më të madhe Kosova e ka nga brenda dhe pastaj nga jashtë!
Ndaj, ju lutemi, jipni fund kësaj maskarade të paparë politike!
3. 5 për qind ose ndryshe mësoni rusisht! Ky ishte ultimatumi që Sekretari i Përgjithshëm i NATO-s, Mark Rutte dha në një takim në Londër më 5 Qershor dhe në Romë më 10 Qershor aleatëve të Aleancaleatëve të Aleancës dhe Ministrave të Jashtëm të Nismës Vajmar + . Duhet patjetër të realizohet kuota prej 5 për qind e GDP-së për NATO-n; ndryshe, paralajmëroi ai seriozisht, mund të keni shtet social dhe logjistikë moderne, por ama duhet të mësoni rusisht!. Duke iu referuar parashkimeve të besueshme mbi mundësinë e një sulmi rus dhe ndaj ndonjë vendi anëtar të NATO-s, kur të ketë mbaruar punë më Ukrainën. Ky ultimatum i drejtë i paraprin Samitit të NATO-s në Hagë më 24 – 25 Qershor dhe atij të BE-së më 30 Qershor.
4. Lindja e Zjarrtë! Kështu mund të quhet tani Lindja e Mesme pas operacionit masiv që Izraeli ndërmori me shumë sukses dhe precizion natën e 12 Qershorit kundër lidershipit dhe bazave ushtarake e bërthamore të Iranit, me pasojat tashmë të njohura, përfshirë shkatërimin e centralit më të madh bërthamor të Natanzit. Me pasoja të mëdha për të gjithë rajonin dhe botën dhe me rrezikun e përhapjes së flakëve të luftës akoma më gjerë.
Izraeli ishte në të drejtën e vet për vetëmbrojtje, kur dihet se Irani e ka shpallur botërisht objektivin për asgjënsimin e shtetit të Izraelit. Tel Avivi shfrytëzoi dobësitë e Iranit pas disfatave të huthëve dhe Hisbulahut, shkatërrimit të mbrojtjes së tij ajrore vitin e kaluar, avancimit në prodhimin e bombës bërthamore dhe mungesës së perspektivës së bisedimeve amerikano- iraniane. Gjithsesi, tani kërkohet ndërhyrja e diplomacisë për të mos u përshkallëzuar më tej situata dhe flakët e luftës.
Shqetësimi tjetër madhor lidhet me pasojat për Ukrainën, lufta dhe mbështetja ndaj të cilës po lihet në hije. Dhe kjo ka të ngjarë të ndodhi qysh tani me Samitin e G-7 në Kanada( 14 – 16 Qershor) dhe në atë të NATO-s në Hagë më 24/25 Qershor.
© 2025 Argumentum
