Kancelari gjerman Friedrich Merz ka thënë se nuk priste që bisedimet SHBA-Iran të mbajtura në Pakistan gjatë fundjavës të jepnin rezultate pozitive.
“Nuk u habita nga vendimi për të ndërprerë bisedimet në Islamabad”, tha Merz në Berlin të hënën.
“Që nga fillimi, nuk pata përshtypjen se ata ishin vërtet të përgatitur mirë”, shtoi Merz, pa dhënë detaje të mëtejshme.
Merz tha se pret që përpjekjet e mëtejshme për t’i dhënë fund luftës së nisur nga Shtetet e Bashkuara dhe Izraeli më 28 shkurt të jenë “një proces i gjatë”, duke shtuar se Berlini ishte në kontakt me palët në konflikt.
“Ky do të mbetet një proces afatgjatë dhe ne do të vazhdojmë të ndiejmë pasojat e kësaj lufte për një kohë të gjatë, edhe pasi të ketë mbaruar”, tha Merz.
Administrata e tij po “përgatitet për faktin se do të shohim një presion të konsiderueshëm në ekonominë gjermane gjatë një periudhe të zgjatur dhe rrjedhimisht një presion të konsiderueshëm edhe në familjet private”, tha kancelari.
Berlini po kërkon të “bëjë gjithçka që është në fuqinë tonë për të ruajtur dhe përmirësuar konkurrueshmërinë e ekonomisë gjermane, si dhe për të lehtësuar situatën për familjet private”, tha Merz, por pranoi se kjo “nuk ishte e lehtë”.
“Nuk do të jemi në gjendje të bëjmë gjithçka. Nuk mund të zgjidhim çdo krizë në botë me para nga Gjermania.”/dpa-argumentum.al
