Ekskluzivisht për ARGUMENTUM
Nga Stefani NOVA
Të prodhosh politikë të jashtme. Ky duket se është imperativi aktual i politikës shqiptare në fillimin e kësaj dekade të re. Teksa rezultoi se dështoi me sukses në prodhimin e asaj të brendshme dekadën që sapo mbyllëm. Njësoj si formula e pesë-vjeçarëve të fundit të epokës komunizëm, kur ekonomia-plan e saj u sugjeronte kooperativave që të ndryshonin desinacionin e të mbjellave. Një gjetje e zgjuar atëherë kjo e agronomëve “të Enverit” për të ngopur popullatën e uritur shqiptare me foragjere, ndërsa magazinat po zbrazeshin gjithmonë e më tepër nga mielli. Gruri, “mbreti” i të lashtave përherë ka qenë i konkurruar të zëvendësohet nga “rivalët” e tjerë të kokrrizuar si misri, apo elbi. Por e kotë. Edhe pse ata mund të ngopin gjenerata të tëra, madje edhe më shumë se ai, nuk mund ta zbresin dot nga ky “fron”…
Njësoj si politika e brendshme e këtij vendi, e cila duket se e ka ushqyer keqazi popullatën e tij për vite e vite me radhë e që tashmë duhet të ndërohet me çdo kusht. Mbillni grurë, jo misër, është për t’u thënë përfaqësuesve të saj, tani që kalendari i jetës së çdo shqiptari shënon vitin e brishtë 2020. Mos i ushqeni më keq dhe sa për t’u ngopur shqiptarët, por dhurojuni një dietë të shëndetshme politike…
Sugjerimi i vetëm? Na ka mbetur mesa duket të prodhojmë vetëm politikë të jashtme. Rrugë tjetër nuk ka. Madje as nuk po na falin tjetër. Të brendshmen e skarcuam vetë me duart tona. Tani dekada e re na ka qendërzuar, (jo për fajin por as për meritën tonë), në mes të zhvillimeve globale e si të tillë, duket ta luajmë mirë “belin” ndërsa kemi vendosur të hedhim vallen universale të kombeve.
A nuk na pëlqen të dukemi? A nuk vdesin politikanët tanë që të shfaqen si aktorë me rëndësi rajonale, evropiane, madje edhe globale? Sikur dinë të flasin apo japin opinione deri edhe për çështjet e ishujve Fixhi? Tashmë e kanë shansin pra. Dhe po të jenë të zotët, le të arijnë të prodhojnë dot politikë të jashtme.
Rendi dhe shorti numerik i ka vendosur ata që të jenë sivjet në krye të Organizatës për Siguri dhe Bashkëpunim Evropian. Të menaxhojnë deri edhe përgatitjet për zgjedhjet në Amerikë, apo siç kanë pretenduar, edhe konfliktin Rusi-Ukrainë. Forca pra, jeni në kohën e duhur! Tregoni se dini të mbillni grurë për eksport, e jo vetëm misër për të ngopur lopët dhe njerëzit në Shqipëri. Veç kujdes! Të paktën mos lini lam duke u mburrur me këto dy shtete se çoç dini të prodhoni, sepse janë pikërisht ato të parat në botë që eksportojnë grurë. Madje mos harroni, se u kanë mbajtur edhe juve me “miell hua” në kohën e Stalinit.
Ja pra, që të bësh “pulitikë të jashtme” nuk qenka edhe aq e thjeshtë të nderuar miq politikanë. Madje, qenka më e vështirë. Dhe vetëm kur të përballeni realisht me të, do të thoni “Ishim më mirë brenda sesa jashtë”. Kur ta kuptoni se të flasësh për Lindjen e Mesme, duhet kompetencë, madje edhe mjaft urtësi. Sepse vetë ky rajon ka përcjellë një të tillë në gjithë ekzistencën e tij historike, edhe pse fati e deshi që ai t’u përulet pasojave të dhimbshme të fashitjes së ngadaltë nga froni i merituar i historisë së globit.
Të flasësh sot nga Tirana, me një kompetencë mburravece, mbi vendin e persëve të lashtë, apo tokat e Betlehemit, si dhe trashëgiminë e pamatë të njerëzimit që lindi mes lumenjve Tigër dhe Eufrat, është aq qesharake sa një fëmijë i fillores të flasë për reformën zgjedhore, nëse duhen lista të hapura apo të mbyllura në votime. Apo të marrësh përspër të flasësh, sërish me kompetencën tipike të politikanit shqiptar “gjitholog”, mbi profilet e reja që po përfton gjeostrategjia si e tillë në rang global, përsëri është qesharake. Janë tematika që përveçse kërkojnë njohuri të thelluara mbi vendet respektive që përfshihen në të tilla çështje, paraqesin nevojën për një maturi të cilën nuk e kemi treguar deri më tani ndërsa kemi folur natë e ditë për politikën e brendshme. Për debatet e nxehta Nano-Rama-Meta-Berisha, etj, të cilat nuk na çuan asgjëkundi në 30 vjet, përveçse një konsumizmi permanent dhe të vazhdueshëm, varfërues dhe i të kotë. Prandaj, kujdes politikanë shqiptarë… Tani që historia po ju vë në qendër të zhvillimeve ndëkombëtare: Mbillni grurë, jo misër! /argumentum.al/
*Opinionet e shprehura në këtë artikull janë të autorit dhe nuk pasqyrojnë domosdoshmërisht qëndrimin editorial të Argumentum.al
© Argumentum
