I dëguari i posaçëm i Kinës tha të hënën pas vizitës në Lindjen e Mesme, se Kina nxit komunitetin ndërkombëtar të bëjë përpjekje për paqe, të promovojë aktivisht bisedimet dhe të këmbëngulë për një zgjidhje diplomatike të mosmarrëveshjeve.
Zhai Jun, i dërguari i posaçëm për çështjet e Lindjes së Mesme, bëri të ditur për mediat se gjatë vizitës së tij sqaroi qëndrimin e Kinës për vendet rajonale.
Sipas tij, kjo është një luftë që nuk duhej të ndodhte. Ai theksoi se popujt e vendeve të Lindjes së Mesme aspironin për paqe dhe stabilitet, gjatë zhvillimit të raundit të fundit të bisedimeve Iran-SHBA, por Shtetet e Bashkuara dhe Izraeli filluan një luftë, duke shkatërruar të gjitha përpjekjet diplomatike. Kjo është thellësisht e pakuptimtë dhe zhgënjyese për çdo njeri të përkushtuar ndaj paqes.
Zhai tha se detajet e krizës tashmë janë të qarta. SHBA dhe Izraeli sulmuan Iranin pa autorizim nga Këshilli i Sigurimit të OKB-së. Kjo është një shkelje e qartë e parimeve të Kartës së OKB-së dhe të ligjit ndërkombëtar. Kina kundërshton dhe dënon me vendosmëri një veprim të tillë. Çdo diskutim mbi mënyrën e zgjidhjes së kësaj krize, duhet të bazohet në një kuptim të shkakut rrënjësor dhe të ofrojë një pamje të plotë të konfliktit.
Ai tha se duhen bërë përpjekje për të parandaluar përhapjen dhe shtimin e armiqësive. Lufta minon seriozisht sigurinë dhe stabilitetin në Lindjen e Mesme, godet rëndë sigurinë e ekonomisë globale, energjisë dhe rrugëve të transportit detar, si dhe kërcënon mirëqenien e të gjitha vendeve. Kina dënon të gjitha sulmet pa dallim ndaj civilëve dhe objektivave joushtarake.
Duke vënë në dukje se prioriteti është të arrihet një armëpushim, Zhai tha se shkalla, intensiteti dhe kohëzgjatja e kësaj lufte kanë tejkaluar ato të luftës 12-ditore vitin e kaluar. Lindja e Mesme ka parë mjaftueshëm trazira. Vendet dhe popujt në rajon shpresojnë veç për paqe dhe qetësi. Palët përkatëse duhet të ndalojnë menjëherë veprimet ushtarake dhe të parandalojnë që situata të përkeqësohet më tej dhe të dalë jashtë kontrollit./cgtn
