Kryeministri i Shqipërisë, Edi Rama, deklaroi se nuk ka asnjë pengesë në rrugën e vendit drejt anëtarësimit të plotë në Bashkimi Europian, pavarësisht debatit të krijuar pas votimit në Kuvend për çështjen e imunitetit të deputetes Belinda Balluku.
Gjatë një konference për shtyp, Rama u ndal te vendimi i Kuvendit për të mos miratuar kërkesën e bërë nga SPAK lidhur me heqjen e imunitetit të Ballukut, duke theksuar se kërkesa e paraqitur nuk përmbushte kushtet minimale për t’u marrë në konsideratë.
Sipas kreut të qeverisë, përpjekjet për ta lidhur këtë vendim me një pengesë në procesin e integrimit europian apo me dobësimin e Reformës në Drejtësi janë të pabazuara.
“Përpjekja për ta lidhur refuzimin me arsye të tjera apo për ta paraqitur si një fakt që do të bllokojë rrugën e Shqipërisë drejt BE-së, apo do të pengojë zbatimin e mëtejshëm të Reformës në Drejtësi, është një përpjekje e shëmtuar”, deklaroi Rama.
Ai shtoi se, sipas tij, këto reagime janë pjesë e një përpjekjeje të vazhdueshme për të krijuar konfuzion në opinionin publik dhe për të penguar përparimin e Shqipërisë në procesin e negociatave me BE-në.
“Nuk ka asgjë të re në këtë situatë. Materiali në këtë rast është i favorshëm për të torollisur njerëzit dhe për të fryrë daullen e luftës kundër qeverisë dhe shumicës qeverisëse”, u shpreh Rama.
Kryeministri nënvizoi gjithashtu se qeveria mbetet e vendosur për të vazhduar rrugën e nisur drejt forcimit të pavarësisë së drejtësisë dhe luftës kundër korrupsionit.
Sipas tij, në rastin konkret nuk kemi të bëjmë me një akuzë për korrupsion.
“Vetë prokuroria nuk ka ngritur një akuzë për korrupsion. Jemi përballë një çështjeje që është nën hetim dhe që mund të hetohet lirisht pa asnjë pengesë”, tha Rama.
Në fund, ai inkurajoi organet e drejtësisë që të vazhdojnë hetimet në çdo drejtim të mundshëm, duke theksuar se çdo pistë ku mund të shfaqet korrupsioni duhet të ndiqet me seriozitet.
“Deri tani nuk jemi përballë një çështjeje korrupsioni. Kjo është pak, por shumë e sigurt”, përfundoi Rama.
/Argumentum. al
