Udhëheqësit e vendeve të Grupit të Shtatë (G7) janë mbledhur në qytetin alpin francez të Evian-les-Bains për samitin e tyre vjetor, në një kohë kur bota po përballet me konflikte të shumta, pasiguri ekonomike dhe sfida gjithnjë e më të mëdha për rendin ndërkombëtar.
Samiti treditor, që zhvillohet nga 15 deri më 17 qershor nën presidencën franceze, ka si synim koordinimin e përgjigjeve të përbashkëta ndaj krizave globale dhe forcimin e bashkëpunimit mes demokracive më të industrializuara të botës.
Një nga momentet më të rëndësishme të ditës së parë ishte takimi dypalësh mes Presidentit francez Emmanuel Macron dhe Presidentit amerikan Donald Trump, pak para nisjes zyrtare të punimeve të samitit.
Gjatë deklaratave për mediat, Trump e cilësoi marrëveshjen e arritur së fundmi me Iranin si një sukses të madh diplomatik dhe tha se administrata e tij do ta përqendrojë tashmë vëmendjen te lufta në Ukrainë.
“Marrëveshja me Iranin na lejon të rikthejmë fokusin diplomatik te Ukraina”, tha Trump, duke lënë të kuptohet se Uashingtoni synon të intensifikojë përpjekjet për t’i dhënë fund konfliktit që vazhdon prej vitesh.
Nga ana e tij, Macron përshëndeti marrëveshjen dhe shprehu gatishmërinë e Francës për të kontribuar në zbatimin e saj.
“Ne jemi të gatshëm të marrim pjesën tonë të përgjegjësisë dhe të jemi pjesë e angazhimit të komunitetit ndërkombëtar për të mbështetur këtë marrëveshje”, deklaroi presidenti francez.
Macron njoftoi gjithashtu se Franca është e gatshme të dislokojë aeroplanmbajtësen “Charles de Gaulle” dhe fregata franceze në Ngushticën e Hormuzit brenda pak ditësh, në mbështetje të sigurisë detare dhe lirisë së lundrimit në rajon.
Ukraina dhe Lindja e Mesme në qendër të diskutimeve
Kriza në Ukrainë dhe tensionet në Lindjen e Mesme pritet të dominojnë axhendën e samitit.
Liderët e G7 synojnë të ruajnë unitetin në mbështetje të Ukrainës, duke diskutuar njëkohësisht perspektivat për një paqe të qëndrueshme dhe garancitë afatgjata të sigurisë për Ukrainën dhe Evropën.
Sa i përket Lindjes së Mesme, diskutimet fokusohen në garantimin e lirisë së lundrimit në Ngushticën e Hormuzit dhe krijimin e kushteve për stabilitet afatgjatë në rajon.
Siguria ekonomike dhe mineralet kritike
Një tjetër prioritet i samitit është siguria ekonomike.
Franca po kërkon angazhime konkrete për të reduktuar çekuilibrat ekonomikë globalë, duke përfshirë mbikapacitetet industriale, borxhet e larta, mungesën e investimeve dhe praktikat e padrejta konkurruese. Sipas organizatorëve, këto faktorë rrezikojnë stabilitetin ekonomik dhe nxisin tendenca proteksioniste që mund të përshkallëzojnë tensionet ndërkombëtare.
Një vend të veçantë në diskutime zë edhe çështja e mineraleve kritike. Rritja e shpejtë e teknologjive të energjisë së pastër, automjeteve elektrike dhe ekonomisë digjitale ka rritur ndjeshëm kërkesën për metale dhe minerale të rralla, të domosdoshme për prodhimin e baterive, gjysmëpërçuesve dhe pajisjeve moderne teknologjike.
Liderët pritet të shqyrtojnë mënyra për diversifikimin e zinxhirëve të furnizimit dhe uljen e varësisë nga një numër i kufizuar vendesh që kontrollojnë sektorin.
Një qasje e re ndaj solidaritetit ndërkombëtar
Presidenca franceze synon gjithashtu të promovojë një model të ri të bashkëpunimit ndërkombëtar, të bazuar në partneritete më efektive dhe më të koordinuara me vendet në zhvillim.
Në këtë kuadër, Franca ka ftuar në samit edhe Brazilin, Egjiptin, Indinë, Kenian dhe Korenë e Jugut. Këto vende partnere kanë marrë pjesë në konsultimet përgatitore gjatë gjithë vitit dhe pritet të kontribuojnë në debatet mbi zhvillimin ekonomik, investimet dhe reformimin e qeverisjes globale.
Mbrojtja e fëmijëve online dhe lufta kundër krimit
Në vijim të Samitit për Inteligjencën Artificiale të mbajtur në Paris në vitin 2025, liderët e G7 do të diskutojnë masa të reja për mbrojtjen e fëmijëve në platformat digjitale.
Një tjetër temë prioritare është lufta kundër trafikut të drogës dhe krimit të organizuar ndërkombëtar. Vendet e G7 synojnë të forcojnë sigurinë në porte dhe të rrisin bashkëpunimin ndërkombëtar kundër rrjeteve kriminale dhe financimit të terrorizmit.
Lufta kundër kancerit, për herë të parë në axhendën e G7
Për herë të parë që nga krijimi i G7 në vitin 1975, lufta kundër kancerit është përfshirë si prioritet në samitin e liderëve.
Franca synon të promovojë bashkëpunimin në kërkimin shkencor, shkëmbimin e të dhënave dhe vendosjen e objektivave afatgjata për uljen e vdekshmërisë dhe rritjen e jetëgjatësisë së pacientëve me kancer.
Një samit në kërkim të konsensusit
I krijuar pas krizës së parë të naftës në vitin 1975, G7 mbetet një nga forumet më të rëndësishme të koordinimit mes demokracive më të industrializuara të botës.
Në Evian, liderët përballen me sfidën e gjetjes së përgjigjeve të përbashkëta ndaj një mjedisi ndërkombëtar gjithnjë e më të paqëndrueshëm. Presidenca franceze ka vendosur si objektiv forcimin e bashkëpunimit ndërkombëtar dhe arritjen e rezultateve konkrete përballë krizave që po formësojnë rendin global të dekadës së ardhshme.
© 2026 Argumentum
