MUSTAFA MELİH AHISHALI
Në një kohë kur tensionet midis Shteteve të Bashkuara (SHBA) dhe Iranit janë rritur, edhe pse liderët e këtyre dy vendeve nuk kanë përmendur mundësinë e luftës në deklaratat e tyre, zhvillimet e fundit e bëjnë të vështirë që kjo mundësi të injorohet.
Eksperti politik iranian Reza Alijani, i cili njihet për afërsinë me reformistët, beson se tensionet midis SHBA-së dhe Iranit mund të eskalojnë në një luftë të shkallës së vogël e cila do të zgjasë një kohë të shkurtër.
Duke folur për Anadolu Agency (AA), Alijani tha se SHBA vazhdojnë që përmes sanksioneve ekonomike të ushtrojnë presion ndaj Teheranit dhe ta detyrojnë atë të ndalojë aktivitetet bërthamore.
“Nëse nuk ka negociata, ndodh luftë e kufizuar”
“SHBA do të vazhdojë presionin për të reduktuar ndikimin e Iranit në rajon. Nëse Teherani nuk dëshiron negociata, SHBA mund të nisë një sulm ajror në shkallë më të vogël nëpërmjet të cilit do të godiste objektet bërthamore të Iranit dhe bazat ushtarake”, vlerëson Alijani.
Ai beson se presidenti amerikan Donald Trump po kërkon së pari ta dobësojë Iranin nga pikëpamja ekonomike.
“Trump nuk dëshiron asnjë ndryshim të pushtetit në Iran. Të provohet diçka e tillë do të kushtonte shumë. Qëllimi është që Irani të dobësohet me sanksione ekonomike dhe kështu të bëhet e vështirë që ai të sigurojë fonde për popullin dhe të ndalojë mbështetjen financiare për degët e tij rajonale”, thotë Alijani.
Ai gjithashtu foli mbi deklaratën e liderit suprem të Iranit Ali Khamenei, i cili është shprehur se Irani nuk do të negociojë.
“Megjithëse Khamenei ka dhënë deklaratë kundër negociatave, kushtet do t’i bëjnë negociatat të domosdoshme dhe do ta shtyjnë liderin e Iranit të bëjë hap mbrapa”, thotë Alijani.
I pyetur në lidhje me dilemat nëse populli në Iran do të qëndronte në anën e shtetit në rast të një lufte të mundshme, ai beson se njerëzit në Iran janë të shqetësuar nga politika e jashtme e qeverisë.
“Populli mendon se ekspansionizmi shiit nuk do t’i sjell dobi vendit. Nëse Teherani dëshiron të ulet me vendosmëri në tryezën e negociatave me SHBA-në, ai duhet të sigurojë paqen brenda vendit dhe të mbyllë hendekun midis popullit dhe qeverisë”, shprehet eksperti politik.
“SHBA mund t’i godasë bazat e gardës revolucionare”
Eksperti iranian për marrëdhëniet ndërkombëtare, Davud Hermidas Bavand, në një deklaratë për gazetën Arman është shprehur se fakti që SHBA ka vendosur Gardën Revolucionare të Iranit në listën e organizatave terroriste ka rritur mundësinë që ajo të sulmojë pozicionet e gardës.
“SHBA ka vendosur Gardën Revolucionare në listën e saj të organizatave terroriste. Kështu, ajo i ka bërë legjitime të gjitha sulmet që do t’i realizojë kundër Iranit. Ata mund të shënjestrojnë bazat e gardës në territorin e Irakut dhe Sirisë, duke i quajtur ato si pozicione terroriste”, ka thënë Bavand.
Ai ka theksuar se SHBA është vend që e llogarit veten të fuqishme për të shpallur terroriste ushtrinë e një vendi dhe për të intervenuar.
“Nëse Irani kundërpërgjigjet, SHBA mund të përgjigjet ashpër me aeroplanmbajtësen luftarake që ka dërguar në rajon”, ka deklaruar Bavand.
Bavand parasheh se Teherani do të ngelet larg sulmeve ndaj njësive ushtarake amerikane në mënyrë që të mos i dhurojë pretekst SHBA-së.
“Washingtoni do t’i cilësonte si sulme të Iranit sulmet e zgjatimeve të saj ndaj objektivave amerikane”, vlerëson eksperti iranian i diplomacisë.
Ai po ashtu i ka vlerësuar hapat e Donald Trump-it kundër Iranit si investim për zgjedhjet presidenciale që do të mbahen në SHBA në vitin 2020.
I pyetur se çfarë masa do të marrë Teherani përballë presionit të SHBA-së, Bavand ka thënë se “Irani duhet të sigurojë botën se Washingtoni po vepron në kundërshtim me të drejtën ndërkombëtare dhe të lirojë të burgosurit politikë në mënyrë që të çojë në dështimin e kartave që SHBA përdor lidhur me të drejtat e njeriut”.
