Papa Leone XIV bën thirrje për t’i dhënë fund tragjedisë së luftës, veçanërisht në Lindjen e Mesme, dhe kujton se lufta vetëm sa i amplifikon problemet dhe krijon plagë të thella pa ofruar zgjidhje të qëndrueshme.
“Lajme alarmuese vazhdojnë të vijnë nga Lindja e Mesme, veçanërisht nga Irani”, tha Papa Leone të dielën në fjalimin e Angelus.
Fjalët e Atit të Shenjtë erdhën vetëm disa orë pasi bombarduesit amerikanë goditën vendet bërthamore në Iran, ndërsa Izraeli dhe Irani kryejnë sulme në territorin e njëri-tjetrit.
“Në këtë skenar dramatik, që përfshin Izraelin dhe Palestinën”, vazhdoi Papa, “vuajtjet e përditshme të popullsisë – veçanërisht në Gaza dhe territore të tjera – rrezikojnë të harrohen, edhe pse nevoja për ndihmë të përshtatshme humanitare bëhet gjithnjë e më urgjente”.
“Sot më shumë se kurrë, njerëzimi bërtet dhe lutet për paqe”, tha ai.
Papa tha se thirrja për paqe “kërkon përgjegjësi dhe arsye dhe nuk duhet të mbytet nga gjëmimi i armëve ose nga fjalët retorike që nxisin konflikt”.
Papa Leone i kërkoi çdo anëtari të bashkësisë ndërkombëtare të marrë përsipër përgjegjësinë e tij morale për të “ndaluar tragjedinë e luftës përpara se ajo të shndërrohet në një humnerë të pariparueshme”.
Kur është në rrezik dinjiteti njerëzor, tha ai, asnjë konflikt nuk është i largët.
“Lufta nuk i zgjidh problemet”, vuri në dukje Papa. “Përkundrazi, ajo i amplifikon ato dhe shkakton plagë të thella në historinë e popujve – plagë që duhen breza për t’u shëruar. Asnjë fitore ushtarake nuk mund të kompensojë kurrë dhimbjen e një nëne, frikën e një fëmije ose një të ardhme të vjedhur”.
Në përfundim, Papa Leone XIV shprehu shpresën e tij që zhurma e armëve të heshtë.
“Le ti heshtë diplomacia armët!”, tha ai. “Le të formësojnë kombet të ardhmen e tyre me vepra paqeje, jo përmes dhunës dhe konflikteve të përgjakshme!”
/Argumentum.al
