Presidenti ukrainas Volodymyr Zelensky përsëriti nga Beogradi se Ukraina nuk e njeh pavarësinë e Kosovës dhe se qëndrimi i Kievit nuk ka ndryshuar. Deklarata vjen në një kohë kur Kosova ka qenë një mbështetëse e fortë politike, diplomatike dhe humanitare e Ukrainës që nga fillimi i agresionit rus, ndërsa Serbia ka refuzuar t’u bashkohet sanksioneve evropiane ndaj Moskës. Ky kontrast ngre pikëpyetje të forta mbi reciprocitetin në marrëdhëniet ndërkombëtare dhe mbi peshën që vazhdojnë të kenë interesat historike mbi solidaritetin e krijuar nga lufta.
Presidenti ukrainas, Volodymyr Zelensky, tha se politika e Ukrainës nuk ka ndryshuar sa i përket mosnjohjes së pavarësisë së Kosovës.
“Ne respektojmë integritetin territorial të partnerëve tanë dhe të drejtën ndërkombëtare. Sa i përket Kosovës, qëndrimi ynë mbetet i pandryshuar. Jemi mirënjohës ndaj Serbisë për respektimin e integritetit territorial të Ukrainës, përfshirë Krimenë”, tha Zelensky gjatë një konference për media në Beograd, së bashku me presidentin serb, Aleksandar Vuçiq.
Pavarësisht se Kievi nuk e njeh pavarësinë e shpallur nga Kosova në vitin 2008, Prishtina i është bashkuar sanksioneve evropiane dhe të Shteteve të Bashkuara kundër Rusisë për shkak të luftës në Ukrainë. Kosova po ashtu ka strehuar gazetarë ukrainas që janë larguar nga vendi i tyre për shkak të luftës.
Ndërkaq, Vuçiq tha se me udhëheqësin ukrainas ka biseduar edhe për bashkëpunimin ushtarak.
“Çfarë do të ndodhë kur të përfundojë lufta, kjo është çështje tjetër”, tha Vuçiq, i cili e mirëpriti Zelenskyn në vizitën e parë zyrtare të presidentit ukrainas në Serbi.
Vuçiq njoftoi se në Serbi, në mesin e shtatorit, do të hapet një fabrikë dronësh, në bashkëpunim me partnerë izraelitë.
“Ukrainasit janë shumë të suksesshëm dhe kanë shumë fabrika të tyre të dronëve”, shtoi ai.
Zelensky vizitoi Serbinë, shtet që është një nga të paktat vende në Evropë që nuk i është bashkuar sanksioneve kundër Rusisë për shkak të luftës në Ukrainë.
“Ne duam paqe dinjitoze”, deklaroi Zelensky, duke theksuar se duhet shfrytëzuar çdo mundësi për arritjen e paqes.
“Çdo mundësi që ekziston në Uashington, Pekin, kryeqytetet e Evropës, mes partnerëve tanë në Lindjen e Mesme, në vendet e Gjirit dhe në të gjitha kryeqytetet e tjera dhe qytetet kryesore në mbarë botën”, tha ai.
Udhëheqësi ukrainas shtoi se shteti i tij po zhvillon çdo lloj bashkëpunimi që mund t’i ofrojë popullit të tij qëndrueshmëri më të madhe dhe mundësi për t’u përballur me të gjitha sfidat e kësaj lufte.
Ai tha se Ukraina është mirënjohëse ndaj BE-së për secilën prej 21 paketave të sanksioneve, por vlerësoi se kjo nuk është e mjaftueshme.
Zelensky tha se në raketat balistike ruse ka qindra mijëra komponentë që në Rusi mbërrijnë nga çdo kontinent.
“Vendosni sanksione ndaj furnizimit me komponentë për prodhimin e armëve ruse. Dhe është e rëndësishme që Rusisë të mos i jepet mundësia të fitojë miliarda”, tha Zelensky.
Presidenti ukrainas nuk iu referua faktit se Serbia refuzon të vendosë sanksione ndaj Rusisë për shkak të pushtimit të Ukrainës.
Serbia mbështet integritetin territorial dhe sovranitetin e Ukrainës, por është një nga të paktat vende evropiane që nuk iu bashkua sanksioneve perëndimore ndaj Rusisë për shkak të pushtimit të Ukrainës.
Vuçiq tha se Serbia do të vazhdojë të respektojë integritetin territorial të Ukrainës.
Vuçiq tha gjithashtu se Serbia nuk do të kundërshtonte që Ukraina të pranohej e para në Bashkimin Evropian.
“Ne kurrë nuk do të krijojmë problem, kurrë nuk do të themi na pranoni ne të parët, ne kemi filluar më herët”, tha presidenti serb.
Serbia dhe Ukraina po vendosin bashkëpunim, ndërsa të dyja vendet janë kandidate për anëtarësim në Bashkimin Evropian, pavarësisht lidhjeve të Beogradit me Kremlinin.
Për çfarë u bisedua?
Zelensky tha se me Vuçiqin kanë biseduar për bashkëpunimin dypalësh dhe për çështje që mund të forcojnë infrastrukturën.
“Ekzistojnë projekte konkrete zhvillimore dhe infrastrukturore, siç janë projektet e rindërtimit në Ukrainë, të cilat mund t’i zbatojmë së bashku”, shtoi ai.
Vuçiq theksoi se autoritetet serbe i kishin premtuar më herët Zelenskyt se do të kujdeseshin për rindërtimin e një qyteti më të vogël që ishte goditur gjatë luftës.
“Dhe ne do ta bëjmë këtë”, tha ai.
Vuçiq njoftoi gjithashtu se Serbia ka ndarë ndihmë të konsiderueshme për Ukrainën.
Ai tha se beson se Ukraina do të jetë më e kënaqur në periudhën e ardhshme sa i përket ndihmës humanitare nga Serbia, para së gjithash për sektorin energjetik, me pajisjet që nevojiten për dimër.
“Besoj se pas përfundimit të luftës, bashkëpunimi ynë do të jetë edhe më i fuqishëm dhe më i madh edhe në planin e politikës së jashtme, në mënyrë që së bashku të mund të eksportojmë në tregje të treta, veçanërisht në kontinentin afrikan dhe aziatik”, tha Vuçiq.
Të dy udhëheqësit shprehën bindjen se së shpejti do të nënshkruhet një marrëveshje për tregti të lirë mes dy vendeve.
Gjatë vizitës së Zelenskyt u nënshkrua një memorandum mirëkuptimi ndërmjet Ministrisë së Bujqësisë, Pylltarisë dhe Ekonomisë së Ujërave të Serbisë dhe Shërbimit Shtetëror të Ukrainës për Sigurinë Ushqimore dhe Mbrojtjen e Konsumatorëve për bashkëpunimin në fushën e shëndetit të kafshëve dhe sigurisë ushqimore.
Zelensky mbërriti në Beograd mbrëmjen e 7 gushtit, ndërsa në aeroport e priti ministrja e Minierave dhe Energjetikës, Dubravka Gjelloviq Handanovq, ndërsa Vuçiq u takua më vonë me të gjatë një darke të organizuar.
Vizita ishte paralajmëruar prej kohësh, ndërsa Zelensky mbërriti në Serbi tri javë pas samitit Ukrainë-Evropa Juglindore në Kiev, në të cilin Vuçiq ishte i vetmi udhëheqës që nuk e nënshkroi deklaratën e përbashkët.
Në atë dokument thuhej se nevojitet rritje e presionit ndaj Rusisë me qëllim përfundimin e pushtimit të saj në Ukrainë.
Interesat historike mbijetojnë mbi realitetin e luftës
Kujtojmë se Shqipëria dhe Kosova kanë treguar një mbështetje të pakushtëzuar politike, diplomatike, ekonomike dhe humanitare ndaj Ukrainës që nga viti 2022, pas agresionit rus ndaj saj. Të dyja kanë qenë të qarta në qëndrimin e tyre në mbështetje të sovranitetit dhe integritetit territorial të Ukrainës, duke u rreshtuar përkrah politikës së vendeve perëndimore ndaj Rusisë.
Edhe pse Ukraina nuk e ka njohur Kosovën, Prishtina ka treguar një solidaritet dhe mbështetje të jashtëzakonshme ndaj Ukrainës gjatë luftës. Kosova i është bashkuar sanksioneve ndaj Rusisë, ka ofruar mbështetje humanitare dhe ka qenë e hapur për të ndihmuar qytetarët ukrainas të prekur nga lufta.
Nga ana tjetër, Serbia është i vetmi vend në Ballkan që nuk i është bashkuar sanksioneve evropiane ndaj Rusisë pas agresionit dhe pushtimit të Ukrainës. Beogradi vazhdon të ruajë marrëdhënie të ngushta me Moskën, edhe pse njëkohësisht deklaron se respekton integritetin territorial dhe sovranitetin e Ukrainës.
Megjithatë, vizita e Zelenskyt në Beograd dhe deklarata e tij se Ukraina nuk ndryshon qëndrimin për Kosovën tregojnë se, pavarësisht realitetit të ri të krijuar nga lufta në Ukrainë, Kievi vazhdon të ruajë qëndrimet e tij të vjetra politike.
Kjo është një dëshmi se si shtetet dhe lidhjet e vjetra historike vazhdojnë të ruajnë peshën e tyre në politikën ndërkombëtare, pavarësisht kontekstit aktual me të cilin përballet sot Ukraina.
Në rastin konkret, Ukraina kërkon mbështetje ndërkombëtare për integritetin e saj territorial dhe kundërshton ndryshimin e kufijve me forcë, ndërsa në rastin e Kosovës vazhdon të mbajë të njëjtin qëndrim të mosnjohjes.
Në të njëjtën kohë, Serbia mbështet integritetin territorial të Ukrainës, por refuzon të vendosë sanksione ndaj Rusisë. Pra, edhe në kushtet e një lufte që ka ndryshuar ekuilibrat në Evropë, interesat kombëtare dhe marrëdhëniet historike vazhdojnë të jenë përcaktuese në politikën e jashtme të shteteve.
Kjo tregon edhe një herë se në marrëdhëniet ndërkombëtare solidariteti nuk sjell gjithmonë reciprocitet dhe mbështetja nuk nënkupton domosdoshmërisht ndryshim të qëndrimeve politike.
Në fund, çdo shtet vazhdon të mbrojë interesat e veta strategjike, edhe kur rrethanat ndërkombëtare ndryshojnë në mënyrë dramatike.
© 2026 Argumentum
