Në nisjen zyrtare të Presidencës Kroate, në Zagreb, Presidenti i Këshillit Evropian, Charles Michel deklaroi se bashkë me Kryeministrin Plenkoviç do të angazhohen javët që vijnë për të dhënë, me shpresë, një sinjal të qartë ndaj vendeve aspirante të Ballkanit. Michel e përfshiu zgjerimin në pikën e tretë të përparësive të punës së pritshme me kroatët këto gjashtë muaj.
“Si mund të garantojmë më shumë qëndrueshmëri, më shumë siguri në fqinjësinë tonë. Si të jetë e mundur të japim, nga ana e Bashkimit Evropian, një sinjal të fortë e të qartë ndaj fqinjëve? Si dhe në lidhje me procesin e zgjerimit, posaçërisht për dy vende, Maqedoninë e Veriut dhe Shqipërinë,” tha Michel.
Ai shtoi se Këshilli Evropian pati një vendim shumë të rëndësishëm strategjik disa muaj më parë, por nuk qe e mundur të arrihej një marrëveshje në Këshill.
“Kjo do të thotë se do të jetë shumë e rëndësishme në javët e ardhshme që sëbashku me kryeministrin Plenkoviç, do të jemi shumë të angazhuar për të zhvilluar një përgatitje politike më të fuqishme në mënyrë që të bëjmë qartësi dhe të japim, shpresoj, një sinjal të qartë. Kjo do të thotë se, shpresoj, të jetë e mundur të përparojmë në modernizimin e procesit të zgjerimit dhe të shohim si është e mundur të japim qartësi për vendet e ndryshme,” shtoi presidenti i Këshillit Evropian.
“Ne do t’i japim mbështetjen e duhur fqinjëtve tanë në rajon dhe shpresojmë se ky samit do t’i japë ritëm marrdhënieve me vendet në dhjetë vitet e ardhshme, dhe shpresojmë të gjejmë zgjidhje për problemin e nisjes së negociatave të anëtarësimit me Shqipërinë dhe me Maqedoninë e Veriut,” tha Andrej Plenkoviç, Presidenca e BE.
“Për këtë fola këtë javë me zotin Macron në Paris, do të flas me komisionerët evropian këtë javë dhe do të flas dhe me Angela Merkel në Berlin të enjten. Është një temë shumë e rëndësishme për në për të cilën punojmë me shumë forcë. Samiti do të hapë një faqe të re në historinë e procesit të zgjerimit,” shtoi ai.
Pas propozimit të Komisionit Evropian për metodologjinë në fund të muajit janar, është samiti i muajt Mars data që synohet për marrjen e një vendimi të mundshëm për Shqipërinë dhe Maqedoninë e Veriut.
Në samitin e Zagrebit në maj vendet e BE-së dhe ato të Ballkanit pritet të përforcojnë mbështetjen ndaj procesit.